Tuesday, July 20, 2010

ഫ്രഞ്ചു വിപ്ലവത്തിന്റെ പ്രധാന കാരണം.




എന്റപ്പനെപ്പോലെ പടിച്ചു പാലക്കാട് ജില്ലാ കളക്ട്ടറാവണമെന്ന ആഗ്രഹമൊക്കെ (അപ്പന്റേതും ആഗ്രഹം മാത്രമാണേ) മണ്ണാര്‍ക്കാട് ഹൈസ്കൂളില്‍ ഒമ്പതാം ക്ലാസില്‍ പടിക്കുമ്പോഴേ എനിക്കുണ്ടായിരുന്നെങ്കിലും, ദിവസേന മുടങ്ങാതെ സ്കൂളില്‍ പോവാന്‍ എനിക്കുള്ള പ്രചോദനങ്ങള്‍ ഞങ്ങടെ തൊട്ടപ്പറത്തുള്ള ജിത്തുവിന്റെ പുതിയ ബി എസ് എല്ലാര്‍ സൈക്കിള്‍ ചവിട്ടാം, ഉച്ചക്കു ഉമ്മ വാഴയിലയില്‍ പൊതിഞു തരുന്ന ചോറിന്റെ കൂടെയുള്ള ഓം‌ലെറ്റ് ഒറ്റക്കു കഴിക്കാം, പിന്നെ ഞങ്ങടെ ക്ലാസിലെ മിസ് കുണ്ടൂര്‍ക്കുന്ന് സിതാര എസ് നായരെ കൂ‍ട്ടോരോടപ്പം കൂടി പഞ്ചാരയടിക്കാം, ഞങ്ങടെ സ്കൂളിലെ മുഴുവന്‍ മാഷെന്മാരുടേയും ഉറക്കം കളയുന്ന സുന്ദരിയായ ബയോളജി മിസ് സുമലത ടീച്ചറെ കണ്ടോണ്ടിരിക്കാമെന്നുള്ളതൊക്കെ ആയിരിന്നു. അക്കാലത്ത് എനിക്കീ ഐശ്വര്യാ റായ് പ്രിയങ്കാ ചോപ്രയേമൊക്കെ ഇന്നത്തത്ര പരിചയമില്ലാത്ത കാരണം വലുതാവുമ്പം സുമലതി ടീച്ചറുടെ അത്ര ഭം‌ഗിയുള്ള ഒരു ഭാര്യയെ കിട്ടണേന്നു ഞാന്‍ പ്രാര്‍ഥിച്ചിട്ടുണ്ട്..

സ്കൂളില്‍ പോവാന്‍ സ്വന്തമായൊരു സൈക്കിള്‍ എന്ന എന്റെ തികച്ചും ന്യായമായ ഡിമാന്റ് കേരളം കേന്ദ്രത്തിനു സമര്‍പ്പിച്ച ദുരിതാശ്വാസ ഫണ്ടിന്റെ അപേക്ഷ പോലെ, “നിനക്കു ഒറ്റക്കു റോഡിലൂടെ സൈക്കിള്‍ ചവിട്ടാന്‍ പ്രായമായിട്ടില്ലടാ” ന്നു പറഞു പ്രാധമിക ഘട്ടത്തിലെ തന്നെ എന്റെ ഫാദര്‍ ഡിസൂസ തള്ളിക്കളയുകയാരിന്നു . ഹും അപ്പനൊക്കെ എന്തുമാവാലോ!!!

രാവിലേയും വൈകീട്ടും സ്വന്തം സൈക്കിളില്‍ ബാഗെല്ലാം പുറകെ വെച്ചു ഹമ്മറില്‍ സല്‍മാന്‍ ഖാന്‍ കണക്കെ വന്നിറങുന്ന ജിത്തുവിനെ ഞങ്ങടെ ക്ലാസിലെ ചുള്ളത്തികളായ ഗ്രീഷ്മയും സിതാരയടക്കമുള്ള പെണ്‍കുട്ടികളും ആണ്‍കുട്ടികളും ആരാധനയോടെ നോക്കിനില്‍ക്കുന്ന കാഴ്ച്ച എനിക്കു സഹിക്കാവുന്നതിലുമപ്പുറമായിരിന്നു.‍ സ്വന്തമായി ഉപഗ്രഹമില്ലെന്നു കരുതി ഇന്ത്യക്കു ബഹിരാകാശ പരീക്ഷണം നടത്താണ്ടിരിക്കാന്‍ പറ്റില്ലല്ലോ??? എനിക്കു സ്കൂളില്‍ പോവാണ്ടിരിക്കാനും.... അതുകൊണ്ടാണു ചെറുപ്പം മുതലേ എന്നെ എല്ലാ കളികളിലും തോല്‍പ്പിച്ചിട്ടുള്ള എന്റെ ആജന്മ ശത്രു, ജിത്തുവിനു ഞാന്‍ വാങിക്കുന്ന എല്ലാ ലക്കം ചിത്രഭൂമിയും വായിക്കാന്‍ കൊടുത്തും എന്റെ വീട്ടിലുണ്ടായ അടക്കാപ്പഴം ദിവസം നാലെണ്ണം വെച്ചു മുണുങ്ങാന്‍ കൊടുത്തും ഞ്ഞങ്ങള്‍ തമ്മില്‍ ഒരു കരാറുണ്ടാക്കിയത്. രാവിലെ സ്കൂളിലേക്കു സൈക്കിള്‍ ജിത്തു ചവിട്ടും ഞാന്‍ പുറകിലിരിക്കും, വൈകീട്ടു ഞാ‍ന്‍ ചവിട്ടും ജിത്തു പുറകിലും.. രണ്ട് പേര്‍ക്കും സ്വീകാര്യമായ ഒരു ബാര്‍ട്ടര്‍ സിസ്റ്റം... എങ്കിലും സ്കൂളിലാര്‍ക്കും എന്നോടൊരു മതിപ്പില്ലാ. ചിത്രഭൂമീടേം അടക്കാപ്പഴത്തിന്റേം രഹസ്യ കരാറൊന്നും അവര്‍ക്കറിയില്ലല്ലോ.. ബ്ലഡീ കണ്ട്രി ഇന്ത്യന്‍സ്...

ഒടുവില്‍ അറ്റകണക്കിനു മുട്ടയില്‍ ഒരു പ്രയോഗം നടത്തി, അപ്പന്റെ മനസ്സു മാറ്റിയാലോന്നു വരെ ആലോചിച്ചു. ബട്ട് വേണ്ടാ, പാവം അപ്പന്‍... ഇനി ഒറ്റ വഴിയെ ഉള്ളൂ.. ഉമ്മ വഴി കേന്ദ്രത്തില്‍ അച്ചന്റെ അടുക്കല്‍ ഒരു റെക്കമ്മെന്റേഷന്‍... അങ്ങനെ ഒരു ദിവസം മെല്ലെ ഉമ്മയുടെ അടുത്തു കൂടി കാര്യമവതരിപ്പിച്ചു... കാര്യം സൈക്കിള്‍ ഉമ്മക്കും ഇഷ്ട്ടമല്ലെങ്കിലും എന്റെ കടുത്ത ഭീഷണികള്‍ ( ഉപാഹാരമടക്കമുള്ള സമരങ്ങള്‍ ) ഭയന്നു ഉമ്മ ഫാദറിനോടു കാര്യം പറഞു.. അതില്‍ അപ്പന്‍ വീണു, സൈക്കിള്‍ മേടിച്ചു തരാമെന്നു അപ്പന്‍ സമ്മതിച്ചു, ബട്ട് സബ്ജെക്ട് ടു വണ്‍ കണ്ടീഷന്‍, ഹാല്‍ഫ് ഇയര്‍ലി എക്സാമിനു എല്ലാ വിശയത്തിലും 75 നു മുകളില്‍ മാര്‍ക്കു മേടിക്കണം.. ദേ കിടക്കുണു, ദിം തരികിട താ...

ലോക സൈക്കിള്‍ ടൂറിനു വിട്ടോ, ഞാന്‍ കപ്പു കൊണ്ടുവരും, സാറ്റ് കളിക്കോ ചട്ടിപ്പന്തു കളിക്കോ വിട്ടോ, ഇനി അതുമല്ലേല്‍ കബടിക്കോ, പൂജ്യം വെട്ടിക്കളിക്കോ വിട്ടോ, എല്ലാ ലോക കീരിടവും ഞങ്ങടെ വീട്ടിലെ ഷോക്കേസിലിരിക്കും... ബട്ട് ദിസ് ഈസ് ടൂ മച്ച് അപ്പാ, ടൂ മച്ച്.... ഈ പറഞ മാര്‍ക്കു മാത്രം ഞാന്‍ വാങൂല്ലാന്നു മാത്രല്ല അതിനടുത്തൂടെ പോലും പോവൂല്ലാന്ന എനിക്കും അതിനേക്കാള്‍ കൂടുതല്‍ എന്റെപ്പനും നന്നായിട്ടറിയാം.. അപ്പനാരാ മോന്‍!!!
ഒരു ഭാഗത്ത് സ്വന്തമായി ഒരു ഹെര്‍ക്കുലിസ് സൈക്കിളെന്ന എന്റെ സ്വപ്നവും മറുഭാഗത്ത് അപ്പന്റെ 75 മാര്‍ക്കും കൂടെ ഹാല്‍ഫ് ഇയര്‍ലി എക്സാമും.. ഐശ്വര്യാ റായിയേയും ബിന്‍ലാദനേം ഒരുമിച്ചു കണ്ട അവസ്ഥ...
പടിച്ചിട്ടു ഞാന്‍ എന്തായലും സൈക്കിള്‍ പോയിട്ടു സൈക്കിള്‍മാര്‍ക്ക് അഗര്‍ബത്തിപോലും മേടിക്കില്ല.. വാട്ട് ട്ടു ഡു??? ഒരൊറ്റ വഴിയേ ഉള്ളൂ.. ജന്മനാ സിദ്ദിച്ച കോപ്പിയടി വൈദഗ്ദ്യം...

അങ്ങനെ ആദ്യത്തെ പരൂക്ഷ വന്നു, സോഷ്യല്‍ സറ്റഡീസ്.. എന്നെകൊണ്ടു കഴിയും വിധം കുറച്ചൊക്കെ പടിച്ച്, തലേന്നു തന്നെ തയ്യാറാക്കിയിരുന്ന കോപ്പിയടിക്കാനുള്ള കടലാസു തുണ്ടുകളെല്ലാം കുറച്ചു അരയിലും, ഷൂസിനിടയിലും ബെഞ്ചിന്റെ മൂലയിലും എല്ലാം ഭദ്രമായി വെച്ചു.
എസ്സേക്കു വരാന്‍ സാധ്യതയുള്ള “ഒന്നാലോക മഹായുദ്ദത്തിന്റെ പ്രധാന കാരണങ്ങള്‍“ ഷൂസിനടിയിലും, “ഫ്രഞ്ചു വ്പ്ലവത്തിന്റെ കാരണങ്ങള്‍“ അരയിലും ‘റഷ്യന്‍ വിപ്ലവവും” “ബോസ്റ്റണ്‍ ടീപാര്‍ട്ടിയുമെല്ലാം“ ബെഞ്ചിന്റെ വിവിധ മൂലകളിലായും സ്ഥലം പിടിച്ചു.

പരീക്ഷ തുടങി, ശാന്ത ടീച്ചറായിരിന്നു എക്സാമിനര്‍.. ചോദ്യപ്പേപ്പര്‍ കയ്യില്‍ കിട്ടിയപ്പം തന്നെ പകുതി ടെന്‍ഷന്‍ തീര്‍ന്നു. കുറേ ഉത്തരം അറിയാം , ബാക്കി ഉത്തരങ്ങള്‍ അരയിലും ബന്‍ചിലുമൊക്കെ ഉണ്ട് താനും, പോരാത്തതിനു എസ്സേ “ഫ്രഞ്ചു വിപ്ലവത്തിന്റെ പ്രധാന കാരണങ്ങളും’... ഇന്നു ഞാനൊരു കലക്കു കലക്കുമെന്റെ കലക്കി കുട്ടാന്നു മനസ്സില്‍ പറഞു സിതാരയെ ഒന്നു ഒളികണ്ണിട്ടു നോക്കി എക്സാം എഴുതാന്‍ തുടങി.

അങനെ ഒരു വിധം എല്ലാം എഴുതി. ഇനി എഴുതാന്‍ ഞമ്മടെ “ഫ്രഞ്ച്” എസ്സേ മാത്രേ ഉള്ളൂ. . കോപ്പിയടിക്കാന്‍ വെച്ചിരുന്ന കടലാസിനായ് മെല്ലെ കൈ ഇട്ടു അരയില്‍ തപ്പിയ ഞാന്‍ ശരിക്കും ഞെട്ടി. ഈശ്വരാ അരയില്‍ വെച്ചിരിന്ന “ഫ്രഞ്ച് വിപ്ലവം“ കാണുന്നില്ല.. ടീചര്‍ കാണാതെ ഷര്‍ട്ട് പൊക്കി ഒന്നുടെ തപ്പി.. അയ്യോ.. ഫ്രഞ്ച് വിപ്ലവം അരയിലുരുന്ന് ബോറടിച്ചു പാന്റ്സിനിടയിലൂടെ താഴെക്കിറങിയിരിക്കുന്നെന്നു തോന്നുന്നു. ഞാന്‍ ഒന്നു ഇളകിയിരുന്ന് അരയിലൂടെ കയ്യിട്ടതും തൊട്ടപ്പുറത്തിരിന്നു പരൂക്ഷ എഴുതുന്ന സിതാര എന്നെ തുറിച്ചു നോക്കുന്നു. ഈശ്വരാ എല്ലാം പോയി. ഇവളിതെന്തു നോട്ടാ നോക്കുന്നേ.. “പെണ്ണേ നീ നിന്റെ പണി നോക്ക്, ഞാനാ ഫ്രഞ്ചു വ്പ്ലവം ഒന്നു തപ്പട്ടേ” എന്നുപറയണമെന്നുണ്ട്.. ബട്ട് ലവള്‍ വിടുന്നില്ല.. അവളുടേ നോട്ടം അരയിലെ എന്റെ കയ്യിലാ...
“അയ്യേ, ഈ പെണ്ണിനിതെന്തു കേടാ.. ട്രീ ഞാന്‍ അത്തരക്കാരനല്ല..അയ്യേ..അല്ലേ അല്ല..നീ വെറുതെ തെറ്റിദ്ദരിക്കല്ലെ’ എന്നു മെല്ലെ ഞാന്‍ പിറു പിറുത്ത് വീണ്ടും അരയില്‍ തപ്പി. ഈശ്വരാ പാന്റിനടിയില്‍ എല്ലാമുണ്ട്, എന്റെ സ്ഥാപക ജന്‍‌ഗമ വസ്തുക്കളെല്ലാം.. ബട്ട് ദേര്‍ ഇസ് നോ ഫ്രഞ്ച് വിപ്ലവം..
ഇന്റെ ഈ പരവശം കണ്ട്, ഈശ്വരാ ഇത്രേം കുട്ടികളുടെ ഇടയിലിരുന്നു ഈ എക്സാമിന്റെ സമയത്തു ഇവനിത്രേം വൃത്തികേടു കാണിക്കുന്നോ എന്ന ഭാവത്തോടെ സിതാര വീണ്ടും എന്നെതന്നേ നോക്കിയിരുപ്പാ.. “പെണ്ണേ, ഇതു നീ വിചാരിക്കുന്ന പോലല്ലാ, ഞാന്‍ എന്റെ പാന്റിനടിയിലെ ഫ്രഞ്ചു വിപ്ലവം തപ്പുവാ,ഇന്നിവിടെ ഫ്രഞ്ചു വിപ്ലവം നടന്നില്ലേ, റിസള്‍ട്ട് വന്നാ എന്റെ വീട്ടീ ഒന്നും രണ്ടും കഴിഞു മൂന്നാം ലോക മഹായുദ്ദം നടക്കും ” എന്നു വീണ്ടും മനസ്സില്‍ പറഞു ഞാന്‍ ഒന്നു കൂടെ കുനിഞിരിന്നു തപ്പാന്‍ തുടങി.
“സിതാരാ, എന്താ, എവിടയാ നോക്കിയിരിക്കുന്നേ??? എഴുതി തീര്‍ന്നോ???”ഞ്ഞങ്ങള്‍ രണ്ട്പേരേയും നെട്ടിച്ചു കൊണ്ട് ശാന്ത ടീച്ചര്‍ ചോദിച്ചു..
“ഇല്ല, ടീച്ചര്‍, ദോണ്ടെ ഇവിടെ പോക്കിരി കോപ്പിയടിക്കുന്നു!!!”
ഹാവൂ, സധാമാനായി... പുവര്‍ ഗേള്‍... ഞാന്‍ തെറ്റിദ്ദരിച്ചു.
“പോക്കിരി, നിന്നെ ഞാന്‍ കുറേ നേരായി ശ്രദ്ദിക്കുന്നു, നീ എന്തെടുക്കുവാ അവിടേ” ശാന്ത ടീച്ചര്‍...
“ അതു, ടീച്ചറേ ഞാനിവിടെ കുറച്ചു മുത്തും പവിഴവും വാരുവാ, എന്താ വരുന്നോ, ഒരു മിച്ചു വാരാം” എന്നു ചോദിക്കണമെന്നുണ്ടായിരുന്നെങ്കിലും ഞാന്‍ തല താഴ്ത്തി മെല്ലെ പറഞു.. “ടീച്ചറേ എന്റെ പെന്‍സിലു താഴെപോയതാ”
“ഉം ഉം ടാ അധികം വിളച്ചിലെടുക്കാതെ അറിയുന്നതെഴുതി പോവാന്‍ നോക്ക്”...
“ ന്നാലും എന്റെ ടീച്ചറേ, ആ ഫ്രഞ്ചു വിപ്ലവം ഒന്നു തപ്പട്ടേ’ ന്നു പറയണമെന്നുണ്ടായിരിന്നു.. ബട്ട് വേണ്ടാ, കാരണം ഇനിയും കളിച്ചാ ടീച്ചറിടിച്ചെന്റെ കുത്തുബ് മിനാറിളക്കും..
“ന്നാലും സിതാരേ ക്രൂരേ, നീ എന്റെ വീടിന്റെ മുന്നിലൂടെയല്ലേ പള്ളീ പോവാ, എന്റെയുള്ളിലുറങിക്കിടക്കുന്ന ടി ജി രവിയെയാ നീ നോവിച്ചു വിട്ടേക്കണേ..“ ന്നു മനസ്സില്‍ കരുതി ഒന്നും മിണ്ടാതെ അറിയുന്നതെഴുതി പോവാന്നു കരുതി വെറുതെ ഒന്നു ബാക്കിലേക്ക തിരിഞു നോക്കിയ ഞാന്‍ കണ്ട കാഴ്ച്ച “ എന്റെ ഫ്രഞ്ചു വിപ്ലവം പേപ്പറിനടിയില്‍ വെച്ചു സുഖമായി പരൂക്ഷ എഴുതുന്ന എന്റെ ഫ്രണ്ട് മണ്ടരി മനീഷിനെയായിരിന്നു....
ന്നാല്ലൂന്റെ മനീഷേ...!!!!

8 comments:

പോക്കിരി said...

ഹെര്‍ക്കുലിസ് സൈകിളും ഫ്രഞ്ചു വിപ്ലവവും...



ബാല്യ കാല സമരണകള്‍ അയവിറക്കി ഒരു സ്കൂള്‍ പോസ്റ്റ്..

Salim PM said...

ശരിക്കും ചിരിപ്പിച്ചു.

Mujeeb said...

he he he...kidilan....

nalla avatharanam...

Unknown said...

suuuuuuuuppppprrrrrrrrrr



al d best...

Unknown said...

ഒരു പാട് ഗ്യാപിനു ശേഷമാണല്ലോ പോസ്റ്റ്‌ വരുന്നേ.. പഴയതൊക്കെ പണ്ട് വായിച്ചിട്ടുണ്ട്. ഇതും നന്നായിട്ടുണ്ട്. ആശംസകള്‍..

smitha adharsh said...

ശ്ശൊ! മണ്ടരി മനീഷിന് ഇതാ,ഇവിടെ ഒരു ആരാധക!!
കടുവയെ പിടിച്ച കിടുവ എന്ന് കേട്ടിട്ടേയുള്ളൂ..
അസ്സല്‍ പോസ്റ്റ്‌..ചിരിപ്പിച്ചു.

നവാസ് കല്ലേരി... said...

പോസ്റ്റ്‌ അടി പൊളി
നല്ല നര്‍മ്മ ഭാവന ..യേത് ..
അത് തന്നെ ..!!

Vishnuprasad R said...

Oru samsayam, pokkiriyude french viplavam engineyaa maneeshinte kayyil ethiyath?